Tónleikar í Dyngju á bolludegi

Mánudaginn 27. febrúar voru haldnir tónleikar í hjúkrunarheimilinu Dyngju og var í það fimmta sinn sem nemendur Tónlistarskólans léku þar þetta skólaárið. Í þetta sinn var boðið upp á flautuleik, píanóleik, gítarleik, klarinettuleik og söng. Efnisskráin var fjölbreytt, allt frá Beethoven til Friðriks Dórs, og nemendur stóðu sig mjög vel. Eins og alltaf tóku íbúar Dyngju unga tónlistarfólkinu vel og nemendur fengu dýrmæta reynslu og þjálfun í því að spila fyrir áheyrendur. Næstu tónleikar í Dyngju eru ráðgerðir þann 27. mars.