Margrét Lára Þórarinsdóttir

Margrét Lára Þórarinsdóttir er fædd á Akureyri en ólst upp á Skriðuklaustri í Fljótsdal. Hún hóf ung tólistarnám bæði í kórastarfi og í þverflautuleik hjá Jóni Guðmundssyni. Margrét  lauk stúdentsprófi frá ME árið 1997 og hóf söngnám 1996 við Tónlistarskólann á Egilsstöðum hjá Keith Reed.  Árin 2001-2002  lærði hún hjá Dóru Reyndal við Söngskólann í Reykjavík og árið 2004 lauk hún 8. stigsprófi hjá Keith Reed við Tónlistarskólann á Egilsstöðum. Árin 2004-2006 stundaði Margrét burtfararprófsnám hjá Keith Reed og Margréti Bóasdóttur og lauk DipABRSM (Burtfararprófi) with Distinction. Árið 2005 hóf Margrét einnig söngkennaranám en tók hlé frá því vegna barneigna. Margrét tók  þátt í ýmsum óperuuppfærslum með Söngskólanum í Reykjavík og Óperustúdíói Austurlands á meðan hún stundaði þar nám.

Margrét stundaði einsöngvaranám í Académie Internationale D´été De Nice Conservatoire í Frakklandi sumrin 1999 og 2000 undir handleiðslu Pr. Lorrain Nubar, kennara við The Julliard School í New York. Í Svarfaðadal sótti hún söngnámskeið undir handleiðslu Dóru Reyndal og Dario Vagliengo sumrin 1999 og 2000 og óperunámskeið sumarið 2001 undir handleiðslu Margaret Zinger og Mörthu Sharp (kennarar við Mozarteum í Salzburg). Hún sótti masterclass í Complete Vocal Technique í Tónlistarskóla FÍH veturinn 2005. 2012-2014 stundaði Margrét söngkennaranám við Söngskólann í Rvk sem kennt er þar í samstarfi við The Royal Academy of Music í London.

Margrét starfaði sem tónmennta- og tónlistarkennari við Gerðaskóla frá 2007-2009. Hún kenndi tónmennt í Egilsstaðaskóla veturinn 1999-2000 og svo aftur 2010-2012. Margrét hóf störf sem söngkennari hjá Tónlistarskólanum á Egilsstöðum í ágúst 2011 og í Tónlistarskólanum í Fellabæ 2013. Haustið 2011 hóf Margrét störf hjá Egilsstaðakirkju með unglingakór og sá kór varð síðan að samstarfsverkefni milli Tónlistarskólans á Egilsstöðum, Tónlistarskólans í Fellabæ,  Menntaskólans á Egilsstöðum og Egilsstaðakirkju og heitir í dag Stúlknakórinn Liljurnar. Haustið 2012 stofnaði hún Kvennakórinn Héraðsdætur og í janúar 2015 stofnaði hún strákasönghópinn Halir Baldurs.