Einsöngur

Söngnám hefur talsverða sérstöðu miðað við annað hljóðfæranám en hljóðfæri söngnemandans, röddin, er hverjum og einum gefin. Einnig eru fyrri kynni söngnema af tónlistarnámi og iðkun tónlistar mjög breytileg. Framangreind atriði geta haft áhrif á framvindu námsins og því getur námshraði nemenda í söng verið afar mismunandi. Söngnám gerir um margt aðrar kröfur til nemenda en nám á hljóðfæri, m.a. varðandi tungumál, framburð, túlkun texta og leikræna túlkun.

Nemendur geta í sumum tilfellum byrjað að stunda söngnám í tónlistarskólanum allt niður í 6 ára en flestir hefja nám síðar, t.d. að loknum forskóla. Söngkennsla nemenda yngri en í 8. bekk grunnskóla fer að mestu fram í hóptímum, en í sumum tilfellum geta yngri nemendur sótt einkatíma í söng. Algengt er að nemendur í söngnámi byrji mun eldri en nemendur í hljóðfæranámi, jafnvel á fullorðinsárum. Algengt er að byrjendur í söngnámi séu 16 til 18 ára, en þetta er þetta mjög einstaklingsbundið og meta verður hvern nemanda sérstaklega.

Söngnám fer fram í einkatímum, en að auki fá nemendur ýmis tækifæri til samsöngs. Kennt er eftir aðalnámskrá tónlistarskóla og söngnemendur byrja að sækja tónfræðitíma þegar kennarar telja það tímabært. Söngnemendur fullu námi í miðnámi og framhaldsnámi fá að auki reglulega meðleikstíma með píanóleikara. Ennfremur er æskilegt að söngnemendur læri að leika á önnur hljóðfæri, einkum píanó.

Hér má sjá nokkur dæmi um klassískan einsöng:

Sópran er hæsta raddgerðin í klassískum söng og hér má heyra Dísellu Lárusdóttur syngja Puccini.

Hér má heyra Karl sat undir kletti eftir Jórunni Viðar í flutningi Eyrúnar Unnarsdóttur, sópransöngkonu.

Altröddin er mun lægri en sópran, eins og má heyra í þessu dæmi úr Matteusarpassíunni eftir Bach.

Tenórröddin er karlmannsrödd í hærri kantinum, og hér má heyra í hinum óviðjafnanlega Pavarotti.

Hér má heyra í Bassanum Kristni Sigmundssyni, en bassinn er djúp karlmannsrödd.