Tónfræðagreinar

Tónfræði er veigamikill hluti af tónlistarnámi og aðalnámskrá tónlistarskóla gerir þá kröfu að nemendur stundi tónfræðinám samhliða hljóðfæra- eða söngnámi sínu. Mikilvægt er að hún sé kennd strax frá byrjun tónlistarnáms, en í upphafi gera nemendur sér oft ekki einu sinni grein fyrir því að þeir séu að læra tónfræði! Það að þekkja nótnanöfnin, lengdargildin, þagnirnar, endurtekningarmerkin, sterkt og veikt, hraðatákn og merki og ýmis orð fyrir hraða er alltsaman tónfræði. Tónfræðin er lykill að því að skilja hvernig tónlist er uppbyggð, að skilja aðra tónlistarmenn þegar þeir tala um tónlist og að geta tjáð sig um og með tónlist á fjölbreyttan hátt.

Í Tónlistarskólanum á Egilsstöðum læra yngri nemendur tónfræði sem hluta af hljóðfæranáminu til að byrja með. Nemendur byrja svo í tónfræðitímum þegar þeir eru komnir í sjötta bekk, eru komnir áleiðis að fyrsta stigs prófi eða hafa tekið fyrsta stigs próf á hljóðfæri. Tónfræðitímarnir fara fram eftir skóla. Nemendur í grunnnámi sækja tíma eina klukkustund í viku í þrjú ár. Þá er er um samþætta tíma að ræða þar sem áhersla er á þrjú mismunandi svið: tónfræðileg þekkingaratriði, tónheyrn og hlustun og greiningu. Nemendur í miðnámi sækja tíma tvær klukkustundir í viku í tvö ár og skiptast þær stundir niður í tónfræði, hlustun og greiningu og tónheyrn. Nemendur í framhaldsnámi ljúka fjórum áföngum í hljómfræði, tónheyrn og tónlistarsögu auk eins áfanga í valgrein til þess klára framhaldspróf á sitt hljóðfæri og er hver áfangi tvær klukkustundir á viku í kennslu. Skólinn býður upp á tónfræðikennslu fyrir fullorðna í grunnnámi, en fullorðnir sækja mið- og framhaldsnámstíma með öðrum nemendum.

Stigs- og áfangapróf á hljóðfæri eru ekki fullgild án þess að nemandi hafi lokið þeirri tónfræði sem tilheyrir viðkomandi stigi. Nemendur sem sinna ekki tónfræðinni sem skyldi geta því t.d. lent í að fá ekki að taka áfangapróf á hljóðfæri eða að fá ekki einingar úr tónlistarskólanum metnar í framhaldsskóla. Árangur þeirra í tónlistarnáminu að öðru leyti verður einnig lakari, enda skortir þá töluverðan skilning á uppbyggingu og tungumáli tónlistarinnar. Það er því mikilvægt að mæta vel í tónfræðitíma og taka námið alvarlega!

Hér má sjá yfirlit yfir tónfræðinámið með hlekkjum á námskrár:

Grunnnám

Tónfræði G1

Tónfræði G2

Tónfræði G3

Miðnám

Hlustun og greining M1

Hlustun og greining M2