Kvikmyndatónleikar

Það var mikið fjör í Tónlistarmiðstöð Austurlands á Eskifirði þegar Lúðrasveit Fljótsdalshéraðs og Blásarasveit Tónskóla Neskaupstaðar sameinuðu krafta sína á vel sóttum kvikmyndatónleikum. Mátti þá heyra yfir 30 manna lúðrasveit skipuð blásturs- og slagverkshljóðfæraleikurum víða af Austurlandi leika listir sínar undir stjórn Hildar Þórðardóttur og Sóleyjar Þrastardóttur. Tónlistarskólinn er stoltur samstarfs- og stuðningsaðili Lúðrasveitar Fljótsdalshéraðs og hefur sveitin í gegnum árin veitt lengra komnum blásturs- og slagverksnemendum á svæðinu, auk áhugamanna og kennara, tækifæri til þess að koma saman og spila skemmtilega tónlist. Tónleikarnir heppnuðust afskaplega vel og við stefnum að því að halda þessu frábæra og skemmtilega samstarfi áfram!