Masterklass í fiðluleik í Tónlistarskólanum á Egilsstöðum

Föstudaginn 13. febrúar og laugardaginn 14. febrúar fékk Tónlistarskólinn á Egilsstöðum til sín góðan gest en það er fiðluleikarinn Hlíf Sigurjónsdóttir. Hún hélt masterklass með nemendum og kennurum á föstudeginum og kenndi þá nemendum í hóp þar sem þeir spiluðu fyrir hvern annan og Hlíf sagði þeim til ásamt því að koma með góð ráð varðandi fiðluleik, en það er ótrúlegt að hve mörgu þarf að hyggja þegar leikið er á fiðlu (eins og önnur hljóðfæri reyndar líka). Það skiptir máli hvernig hljóðfæraleikarinn stendur, hvernig hann heldur á hljóðfærinu og boganum, hvernig hann andar og hvernig hann hreyfir sig þegar leikið er og margt, margt fleira.

Á laugardeginum tók Hlíf nemendur í einkatíma og leiðbeindi að lokum nemendum á hljómsveitaræfingu.

"Hlíf Sigurjónsdóttir fædd í Kaupmannahöfn en ólst upp í Reykjavík. Hún kom fyrst opinberlega fram 11 ára gömul er hún lék einleik með Sinfóníuhljómsveit Íslands. Hún nam fiðluleik hjá Birni Ólafssyni konsertmeistara við Tónlistarskólann í Reykjavík og fór síðar til framhaldsnáms við Háskólana í Indiana og Toronto og Listaskólann í Banff og nam einnig hjá Gerald Beal fiðluleikara í New York borg.

Hlíf hefur haldið fjölda einleikstónleika og leikið með sinfóníuhljómsveitum og kammersveitum víða um Evrópu, í Bandaríkjunum og Kanada. Hún hefur frumflutt mörg tónverk sem samin hafa verið sérstaklega fyrir hana.

Hlíf hefur leikið inn á upptökur fyrir útvarp og sjónvarp og nokkra geisladiska við frábæran orðstír. Tónlistargagnrýnandi Morgunblaðsins gaf geisladisknum 44 Dúó með verkum eftir Béla Bartók fimm stjörnur með orðunum „Þjóðleg innlifun á heimsmælikvarða“. Í ágúst 2008 kom út tvöfaldur geisladiskur með leik hennar á öllum þremur sónötum og þremur partítum eftir Johann Sebastian Bach." (tekið af heimasíðu Hlífar, www.hlifsigurjons.is)

Nemendur stóðu sig með prýði og voru mjög ánægðir með námskeiðið. Það er alltaf gaman að fá til sín góða gesti bæði fyrir nemendur og kennara því að allir geta jú bætt við sig þekkingu og kunnáttu, svo lærir sem lifir.