Tónleikar á Dyngju

Tónlistarskólinn hélt sína reglubundnu tónleika á hjúkrunarheimilinu Dyngju þriðjudaginn 27. febrúar. Íbúar og aðrir tónleikagestir fengu að hlýða á marga unga píanóleikara og tvær glæsilegar söngkonur að þessu sinni. Flytjendur voru á breiðu aldursbili og voru þetta allt frá byrjendum til framhaldsnema í tónlist sem stóðu sig með prýði, allir sem einn, og móttökurnar voru mjög góðar. Það er afar ánægjulegt að fá að vera í þessu samstarfi við Dyngju, þar sem gagnkvæmur ávinningur íbúa Dyngju og nemenda Tónlistarskólans er svo mikill. Við þökkum starfsfólki og íbúum Dyngju kærlega fyrir móttökurnar og hlökkum til að koma aftur í næsta mánuði!