Tónlistarmessa og ljósahátíð

Sunnudaginn 10. mars var mikið um dýrðir í Egilsstaðakirkju þar sem haldin var ljósahatíð í tilefni uppsetningar nýs ljósabúnaðar sem lýsir upp kirkjuna að utanverðu. Einnig fór fram tónlistarmessa, þar sem nemendur og kennarar tónlistarskólanna á Fljótsdalshéraði sáu um tónlistarflutning auk kórs kirkjunnar, en slíkar messur hafa verið einu sinni á önn síðustu fjögur árin. Flutt var tónlist eftir Pergolesi, Fauré og Rheinberger, auk þess sem kórinn söng Lífsins ljós, afar fallegt lag, en Hreinn Halldórsson er höfundur lags og texta. Auk þess kom glæsilegi kammerhópurinn sem sést á myndinni fram í fyrsta sinn, en hann ber nafnið Musica oriente.