Berglind Halldórsdóttir

Berglind Halldórsdóttir er fædd á Ísafirði árið 1982, en ólst upp frá fjögurra ára aldri í Hveragerði. Hún stundaði nám í klarínettuleik hjá Malcolm Holloway í Tónlistarskóla Árnesinga, og í Tónlistarskólanum í Reykjavík hjá Kjartani Óskarssyni og Sigurði I. Snorrasyni.

Berglind nam við Háskólann í Stavanger undir handleiðslu Håkon Vestly. Hún lauk þaðan bakkalárgráðu í klarínettuleik vorið 2009 og diplóma í tónlistarkennslufræðum vorið 2011. Hún stundaði þar einnig meistaranám í klarínettuleik.

Berglind hefur spilað með Blásarasveit Reykjavíkur og Nordens Blåsorkester, auk fjölda annarra lúðra- og blásarasveita hérlendis og í Noregi.

Hún var es-klarínettuleikari Blásarasveitar og Sinfóníuhljómsveitar Háskólans í Stavanger, auk þess að deila stöðu sóló-klarínettuleikara sinfóníunnar með öðrum nema við skólann. Hún hefur einnig komið fram með Sinfóníuhljómsveit Stavanger og spilað í söngleikja- og óperuhljómsveitum.

Berglind var sólóklarínettuleikari Sinfóníuhljómsveitar Møre og Romsdal veturinn 2012-2013, samhliða störfum sem kennari við tónlistarskólann í Molde. Í dag er hún klarínettuleikari í Sinfóníuhljómsveit Austurlands auk þess að leika með Lúðrasveit Fljótsdalshéraðs.

Berglind hefur starfað sem tónlistarkennari nær óslitið frá árinu 2002, fyrst hjá Skólahljómsveit Vesturbæjar, Skólahljómsveit Grafarvogs og Tónskóla Eddu Borg í Reykjavík. Í Stavanger kenndi hún hjá skólahljómsveitunum í Madlamark og Våland. Hún starfaði einnig hjá Listaskólanum í Molde, þar sem hún kenndi á klarínettu og saxófón og stjórnaði byrjendalúðrasveit.

Berglind starfar nú sem aðstoðarskólastjóri, blásarakennari, forskólakennari og tónfræðikennari við Tónlistarskólann á Egilsstöðum og Tónlistarskólann í Fellabæ.