Þegar tímar falla niður

Þegar tímar falla niður í Tónlistarskólanum spyrja foreldrar og nemendur stundum hvort tíminn verði bættur upp eða hvort skólagjöld séu endurgreidd. Svarið við þessu fer eftir aðstæðum hverju sinni, en um þetta gilda ákveðnar reglur. Hér má finna upplýsingar um þær reglur sem gilda um tíma sem falla niður í skólanum og ástæðurnar á bak við þær.

Hvenær falla tímar niður?

Stutta svarið: Þegar kennari er veikur eða getur af öðrum ástæðum ekki kennt tímann eða þegar nemandi kemst ekki eða kemur ekki í tíma.

Langa svarið: Lang algengast er að tímar falli niður vegna veikinda, en kennarar eiga rétt á veikindaleyfi samkvæmt kjarasamningi eins og aðrir launþegar. Kennarar eiga einnig rétt á leyfi frá vinnu í allt að tvær vikur við andlát náins ættingja. Stundum eru kennarar veðurtepptir eða komast ekki í skólann vegna ófærðar. Einnig geta önnur störf kennarans orðið til þess að tími falli niður, en algengast er að slíkt gerist í kringum árshátíðir Egilsstaðaskóla og aðra slíka viðburði. Kennari getur líka þurft að fella niður tíma vegna persónulegra ástæðna. Stundum fellur tími niður vegna þess að nemandi kemst ekki í tímann, t.d. þegar hann er veikur eða þegar uppbrot í skólastarfi Egilsstaðaskóla verður til þess að hann komist ekki.

Hvenær eru tímar bættir upp?

Stutta svarið: Þegar kennari fellir niður tíma af persónulegum ástæðum.

Langa svarið: Kennurum ber ekki að bæta upp tíma sem falla niður vegna veikinda eða vegna annarra kjarasamningsbundinna réttinda, svo sem við andlát náins ættingja. Ef kennarar komast ekki í vinnu vegna aðstæðna sem eru óviðráðanlegar með öllu, t.d. ófærðar, ber þeim heldur ekki að bæta upp kennslu. Ef persónulegar aðstæður hjá kennara verða til þess að kennsla fellur niður ber honum hins vegar almennt að bæta það upp. Það sama á við ef hann kýs að taka sér leyfi á skólatíma, en kennarar eru alla jafna ekki hvattir til þess. Ef tímar falla niður vegna annarra starfa kennarans, t.d. vegna árshátíðar eða fundahalds, er það bætt upp að því marki sem því verður við komið. Í þeim tilfellum ber kennara að gæta þess að enginn einn nemandi missi marga tíma af þessum völdum.

Persónuverndarlög koma í veg fyrir það að skólastjóri segi frá því þegar kennarar eru veikir, en kennurum ber að hafa frumkvæði að því að bæta upp þá tíma sem þeim ber að bæta upp.

Kennara ber ekki að bæta upp tíma þegar nemandi kemst ekki eða kemur ekki í tímann sinn.

Hvað með afleysingu?

Stutta svarið: Yfirleitt er engin afleysing í einkatímum, en stundum í tónfræði og forskóla. Ef kennari er fjarverandi í lengri tíma reynir skólinn að bjóða upp á afleysingu.

Langa svarið: Í grunnskóla er það yfirleitt svo að ef kennsla fellur niður er fenginn afleysingakennari til þess að kenna tímana sem annars féllu niður. Í tónlistarskólum eru hins vegar aðstæður aðrar. Kennarar skólans eru mjög sérhæfðir og flestar greinar sem kenndar eru þarfnast kennara sem kann að kenna viðkomandi grein. Slíkur kennari er oftast ekki til taks og jafnvel þó að hann sé það er hann oft upptekinn við að kenna sínum eigin nemendum. Í þeim tilfellum þar sem hægt er að leysa af með auðveldum hætti er það gert og skólastjórnendur leysa t.d. af í tónfræðigreinum og forskólakennslu ef möguleiki er á því.

Ef útlit er fyrir að kennari verði frá störfum til lengri tíma, t.d. vegna veikinda, reynir skólinn hins vegar að útvega viðeigandi afleysingakennara fyrir nemendur.

Hvenær eru skólagjöld felld niður?

Stutta svarið: Aðeins við langvarandi fjarveru kennara þar sem ekki tekst að finna afleysingu.

Langa svarið: Skólagjöld eru almennt ekki felld niður vegna kennslu sem fellur niður. Samkvæmt 11. grein laga um fjárhagslegan stuðning við tónlistarskóla frá 1985 greiða skólagjöld ekki fyrir kennslukostnað, en hún hljóðar svo:

11. gr. Tónlistarskólar skulu innheimta skólagjöld. Skólagjöldum er ætlað að standa undir öðrum kostnaði við skólareksturinn en launakostnaði kennara og skólastjóra, að svo miklu leyti sem rekstrarkostnaðurinn er ekki borinn af styrktarmeðlimum eða annarri fjáröflun.

Skólagjöldin eru því alls ekki gjald fyrir ákveðinn fjölda kennslutíma, heldur árgjald sem greitt er fyrir aðgang að skólanum, þar á meðal aðstöðu og búnaði þar, einkatímum, tónfræðitímum, hljómsveitaræfingum, tækifærum til að koma fram og taka þátt í verkefnum á vegum skólans og fleira slíku. Sveitarfélagið greiðir laun kennaranna og heldur áfram að gera það í veikindaleyfi þeirra. Nemandi heldur plássi sínu við skólann og sækir þá tíma sem ekki falla niður, t.d. tónfræði og hljómsveitaræfingar, auk þess að umsýsla í kringum viðkomandi nemanda á sér enn stað.

Þó er það svo að ef aðalkennari nemanda er frá um lengri tíma, t.d. vegna veikinda, og ekki tekst að finna afleysingu fyrir hann er nemandi ekki að njóta þeirrar kennslu sem til stóð og eðlilegt er að ætlast til. Þá er fjarvera kennara líklega farin að bitna með marktækum hætti á námi nemandans og tími til kominn að skoða niðurfellingu á gjöldum. Þetta er gert í þeim tilfellum þar sem kennsla fellur niður í mánuð eða lengur samfellt. Eru þá skólagjöld felld niður að því leyti sem eðlilegt getur talist og stjórnast það af aðstæðum hverju sinni, svosem að hve miklu leyti kennsla fellur niður og í hversu langan tíma.