Gítar - klassískt nám

Á liðnum áratugum hafa fá hljóðfæri notið meiri vinsælda en gítarinn, jafnt í klassískri sem rytmískri tónlist. Auk þess er hann algengastur undirleikshljóðfæra við alþýðusöng. Gítar er strengjahljóðfæri úr viði. Hann hefur kassa (þar sem hljómurinn myndast), háls með 6 strengum (þar sem valinn er tónn til þess að spila) og haus (þar sem hægt er að stilla strengina).

Nútíma gítar hefur uppruna sinn á Spáni á miðri 19. öldinni en áður voru til aðrar tegundir sem litu öðruvísi út og voru gjarnan með fleiri strengi, t.d. lútur og barokk gítarar. Algengustu tegundirnar af kassagíturum er klassískur gítar, notaður mest í klassískri tónlist, og stálstrengjagítar, notaður mest í öðrum tegundum tónlistar. Klassískir gítarleikarar spila oftast einir eða í samspili með fáum öðrum hljóðfæraleikurum vegna þess að hann er frekar lágvær.

Aðalnámskrá tónlistarskólanna í gítarleik skiptist í tvær brautir: klassíska og rytmíska. Ef vafi leikur á því hvort nemendur hafi frekar áhuga á klassísku eða rytmísku námi er gott að skoða málið í samráði við kennara.

Byrjendur byrja gjarnan á að læra á klassískan gítar vegna þess að á honum eru nælonstrengir sem er mun þægilegra að spila á en stálstrengi. Nemendur geta í sumum tilfellum byrjað að stunda klassískt gítarnám í tónlistarskólanum allt niður í 6 ára en flestir hefja nám síðar, t.d. að loknum forskóla.

Mikilvægt er að stærð hljóðfæris hæfi líkamsþroska nemandans og sé í góðu ástandi. 6-10 ára nemendur spila á ½ gítara, sem er minnsta stærðin og síðar á ¾ gítara sem henta nemendum allt frá 8-15 ára. Mikilvægt er að ráðfæra sig við kennara þegar kemur að hljóðfærakaupum.

Klassískt gítarnám fer fram í einkatímum, en að auki fá nemendur ýmis tærkifæri til að taka þátt í samspili. Kennt er eftir aðalnámskrá tónlistarskóla og gítarnemendur byrja að sækja tónfræðitíma þegar kennarar telja það tímabært.

Hér má sjá nokkur myndbönd sem tengjast klassískum gítar:

Hér leikur Michael Lucarelli Malaguena, en mikið af gítartónlist er í spænskum stíl.

Hér má sjá dæmi um háklassíska gítartónlist eftir Mauro Giuliani.

Hér er m.a. hægt að heyra hvernig hægt er að breyta hljómnum í hljóðfærinu.

Svo er ekkert sem segir að það sé ekki hægt að spila rokklög á klassískan gítar.

Hér má heyra mjög frægt einleiksverk fyrir gítar, Concierto de Aranjuez eftir Joaquin Rodrigo.