Trommusett

Hugtakið rytmísk tónlist er safnheiti yfir djass, rokk og skyldar tónlistartegundir sem ekki teljast til klassískrar tónlistar í almennri merkingu þess hugtaks. Miðað er við að nám í rytmískri tónlist sé eins upp byggt og lúti sömu lögmálum og annað tónlistarnám sem skilgreint er í aðalnámskrá tónlistarskóla en viðfangsefni eru að miklu leyti önnur.

Trommusettið telst vera ungt hljóðfæri þó að einstakir hlutar þess eigi sér flestir langa sögu. Það byrjaði að þróast um 1900, en um 1930 tók trommusettið á sig þá mynd sem er ríkjandi í dag. Trommusettið gegnir mikilvægu hlutverki í mörgum tegundum tónlistar, svo sem djassi, poppi, rokki og blúsi.

Í grunnnámi á trommusett er gert ráð fyrir að nemendur nái að auki tökum á algengustu slagverkshljóðfærum, s.s. hristum, tambúrínum og handtrommum. Trommusettið hefur nokkra sérstöðu hvað varðar tónmálsþáttinn meðal annarra hljóðfæra og eru tækniæfingar miðaðar algerlega við slagtækni, samhæfingu og getu til að leika og spinna út frá mismunandi takbrigðum.

Algengt er að nám á trommusett hefjist á aldrinum 8-9 ára. Til að nám geti hafist á trommusett þarf nemandi að hafa líkamlega burði til að valda auðveldlega trommukjuðum og ná til gólfs þegar setið er á trommustól. Frá upphafi náms þarf nemandi að eiga æfingaplatta og kjuða af heppilegri stærð og þyngd en þegar líður á námið þurfa þeir að hafa til umráða trommusett. Rafmagns- og æfinga-trommusett geta hentað vel til heimaæfinga, en mikilvægt er að nemendur öðlist einnig reynslu í leik á hefðbundið trommusett. Mikilvægt er að ráðfæra sig við kennara þegar kemur að hljóðfærakaupum.

Nám á trommusett fer fram í einkatímum, en að auki fá nemendur ýmis tækifæri til samspils. Kennt er eftir aðalnámsskrá tónlistarskóla og trommunemendur byrja að sækja tónfræðitíma þegar kennarar telja það tímabært.

Hér má sjá nokkur skemmtileg tóndæmi sem tengjast trommusetti:

Hér má sjá dæmi um upphitun með tækniæfingum á æfingaplatta.

Hér má sjá dæmi um upphitun með tækniæfingum á trommusett.

Hér má sjá skemmtilega upptöku af Jóni Geir Jóhannsyni spila með Skálmöld.

Hér má sjá hvað gerist þegar tveir ólíkir tónlistarstílar mætast og keppa sín á milli.

Ef menn eru duglegir að æfa sig þurfa þeir ekki að vera háir í loftinu til að fara að rokka!