Píanó - rytmískt nám

Hugtakið rytmísk tónlist er safnheiti yfir djass, rokk og skyldar tónlistartegundir sem ekki teljast til klassískrar tónlistar í almennri merkingu þess hugtaks. Miðað er við að nám í rytmískri tónlist sé eins upp byggt og lúti sömu lögmálum og annað tónlistarnám sem skilgreint er í aðalnámskrá tónlistarskóla en viðfangsefni eru að miklu leyti önnur.

Segja má að píanóið hafi tvöfalt hlutverk í rytmískri tónlist. Annars vegar er það algengt undirleikshljóðfæri og því er mikilvægt fyrir píanónemendur að tileinka sér góða og fjölbreytta raddsetningu hljóma og hljómasambanda. Þekkingu á þessu sviði þarf að auka jafnt og þétt á námsferlinum ásamt samleiksþjálfun. Á hinn bóginn gegnir píanóið einleikshlutverki, bæði í hljómsveitum og við aðstæður þar sem píanóleikari leikur einn og óstuddur. Spunaþjálfun er því ekki síður mikilvæg í gegnum allt námið en þekkingu og þroska á þessu sviði þarf að auka markvisst í gegnum allt námið. Auk hins hefðbundna píanós hafa rafpíanó og hljóðgervlar af ýmsum gerðum orðið snar þáttur í veröld píanóleikara í rytmískri tónlist. Æskilegt er að nemendur í rytmískum píanóleik kynnist rafhljómborðum og möguleikum þeirra.

Nauðsynlegt er að nemendur hafi aðgang að píanói til æfinga heima fyrir ásamt píanóstól við hæfi. Þá er miklvægt að hljóðfærið sé vel stillt og staðsett þar sem nemandi getur haft gott næði til æfinga. Mikilvægt er að ráðfæra sig við kennara þegar kemur að hljóðfærakaupum.

Til þess að geta hafið nám í rytmískum píanóleik í tónlistarskólanum verður nemandi að hafa lokið grunnámi ípíanóleik. Rytmískt píanónám fer fram í einkatímum, en að auki fá nemendur ýmis tækifæri til samspils. Kennt er eftir aðalnámsskrá tónlistarskóla og rytmískir píanónemendur sækja tónfræðitíma samhliða píanónáminu.

Hér má sjá nokkur skemmtileg dæmi um rytmískan píanóleik:

Oft spila poppsöngvarar undir hjá sjálfum sér á píanó, hér má sjá Alicia Keys gera það.

Píanó er oft notað í djasstónlist, og hér má sjá Oscar Peterson leika listir sínar.

Og píanó gegnir oft mikilvægu hlutverki í rokktónlist líka, eins og til dæmis í þessu fræga Queen lagi.

Hér má sjá smá kennslu í rytmískum píanóleik.

Og hér má sjá sama lag í flutningi John Legend.