Nám í boði

Í Tónlistarskólanum á Egilsstöðum fer fram kennsla á fjölbreytt úrval hljóðfæra og í söng.

Forskóli

Flestir nemendur hefja sitt tónlistarnám í forskóla. Námið byggist á hóptímum, þar sem 3-7 krakkar eru saman í hóp. Hver hópur fær eina kennslustund í 30 mínútur á viku og fer kennslan fram eftir skólatíma. Forskólanámið er tveir vetur, með möguleika á framhaldsnámi í þriðja veturinn. Nemendur sem hafa verið í forskóla í Tónlistarskólanum ganga fyrir þegar kemur að skráningu í hljóðfæra- og söngnám síðar. Nemendur í fyrsta bekk fara í Forskóla 1, en nemendur í öðrum og þriðja bekk býðst að velja á milli fimm forskólahópa, sem hver leggur áherslu á ákveðna gerð tónlistarflutnings.

Söngnám

Í Tónlistarskólanum er boðið upp á klassískt og rytmískt söngnám í einkatímum og samkennslu í söng fyrir yngri nemendur. Heilt nám felur í sér 60 mínútna kennslu á viku, sem oft skiptist niður í tvo 30 mínútna tíma, og hálft nám er 30 mínútur á viku. Að öllu jöfnu mælum við frekar með því við nemendur að vera í heilu námi því það gefur yfirleitt mun betri árangur. Almennt fer kennsla nemenda yngri en í 8. bekk fram í hóptímum, en þó eru undantekningar á því.

Hljóðfæranám

Þegar nemendur fara í hljóðfæranám gefst þeim kostur á að vera í heilu eða hálfu námi. Heilt nám felur í sér 60 mínútna kennslu á viku og hálft nám er 30 mínútur á viku. Að öllu jöfnu mælum við frekar með því við nemendur að vera í heilu námi því það gefur yfirleitt mun betri árangur. Misjafnt er eftir hljóðfærum á hvaða aldri er gott að byrja og eru nánari upplýsingar um það hér til hægri í umfjöllun um einstök hljóðfæri, en algengt er að nemendur byrji 8-9 ára, oft að loknum forskóla.

Tónfræði

Tónfræðikennsla er veigamikill hluti af tónlistarnáminu. Þeir nemendur sem eru komnir nokkuð af stað í sínu hljóðfæra- eða söngnámi sækja tónfræðitíma. Algengt er að nemendur hefji tónfræðinám í 6. bekk, en þó hefja sumir nám í 5. bekk og jafnvel 4. bekk. Stigspróf og áfangapróf á hljóðfæri og í söng eru ekki fullgild nema nemendur hafi einnig lokið þeirri tónfræði sem tilheyrir viðkomandi stigi eða áfanga. Tónfræðitímar eru eftir skólatíma. Nemendur í grunnámi sækja tónfræðitíma eina klukkustund í viku en nemendur í miðnámi sækja tíma tvær klukkustundir í viku. Nemendur í framhaldsnámi ljúka fjórum önnum í hljómfræði, tónlistarsögu og tónheyrn og einni önn í valgrein til þess að klára framhaldspróf í tónlist.