Fiðla

Fiðlan er minnst í fjölskyldu strengjahljóðfæranna en jafnframt langfjölmennasta hljóðfærið í sinfóníuhljómsveit. Hún er mjög fjölhæft hljóðfæri og mikið notuð í ýmsum tegundum tónlistar, svo sem klassískri tónlist og þjóðlagatónlist. Fiðlan þróaðist út frá ýmsum strengjahljóðfærum miðalda. Þessari þróun lauk um miðja 16. öld og hefur fiðlan lítið breyst síðan. Fiðlan hefur fjóra strengi sem eru stilltir á tónana G, D, A og E og hún er yfirleitt stokin með boga, en stundum plokkuð.

Nemendur geta í sumum tilfellum byrjað að stunda fiðlunám í tónlistarskólanum allt niður í 6 ára, en flestir hefja nám síðar, t.d. að loknum forskóla. Mikilvægt er að stærð hljóðfæris hæfi líkamsþroska nemandans, stærð fiðlu og boga sé í réttum hlutföllum og að hvort tveggja sé í góðu ástandi. Tónlistarskólinn leigir út hljóðfæri til nemenda sinna fyrstu árin en yfirleitt er gert ráð fyrir að nemendur eignist eigið hljóðfæri þegar þeir eru komnir nokkuð áleiðis í námi sínu. Mikilvægt er að ráðfæra sig við kennara þegar kemur að hljóðfærakaupum.

Fiðluleikarar þurfa að hafa sérlega gott tóneyra og vera mjög nákvæmir af því að á fiðluhálsinum eru engin merki um hvar á að setja fingurna, eins og t.d. á gítar. Það þarf þolinmæði til þess að læra á fiðlu og það tekur oft langan tíma að ná fallegum tóni. Æskilegt er að fiðluleikarar fái að kynnast víólunni síðar í náminu og þeim eðlismun sem er á þessum tveim náskyldu hljóðfærum.

Fiðlunámið skiptist í einkatíma og hljómsveitaræfingar með strengjasveitum skólans, en að auki fá nemendur tækifæri til að spila í minni samspilshópum. Kennt er eftir aðalnámskrá tónlistarskóla og fiðlunemendur byrja að sækja tónfræðitíma þegar kennarar telja það tímabært.

Hér eru nokkur skemmtileg tóndæmi þar sem fiðlan er í aðalhlutverki:

Fiðlan er oft í einleikshlutverki og hér má heyra fiðlukonsert Mendelssohns.

Hér spilar Alexander Markov Kaprísu nr. 24 eftir Niccolo Paganini.

Fiðlan er líka mikið notuð í þjóðlagatónlist og stundum jafnvel rokki. Hér spilar Lindsey Stirling svoleiðis lag.

Hér má heyra hið fræga lag The Devil Went Down to Georgia með The Charlie Daniels Band.

Hér má sjá James Bond lagið Skyfall með Adele spilað á fiðlu.