Harmonika

Þó að harmonika eigi sér tiltölulega skamma sögu í íslenskum tónlistarskólum hafa fá hljóðfæri notið jafnmikilla vinsælda meðal alþýðu manna. Harmonika var um langt árabil leiðandi hljóðfæri í dans- og alþýðutónlist til sjávar og sveita. Í dag nýtur harmonikan enn sem fyrr vinsælda á þessu sviði en auk þess hefur á síðastliðnum áratugum verið samið talsvert af nútímatónlist fyrir harmoniku. Þá er einnig hægt að
nota ýmiskonar eldri tónlist, sem samin var fyrir önnur hljóðfæri, auk sérstakra umritana fyrir harmoniku. Þannig spanna tónbókmenntir harmonikunnar víðara svið en margur hyggur.

Nám á harmoniku getur hafist þegar nemendur hafa líkamlega burði til að leika á hljóðfærið. Hefji nemendur nám á litlar harmonikur er gert ráð fyrir að þeir skipti yfir á stærri hljóðfæri þegar áleiðis miðar í náminu og í samræmi við aukinn líkamsþroska. Þróun í harmonikusmíði hefur verið ör á síðustu áratugum og eru harmonikur nú fáanlegar í ýmsum stærðum og gerðum og geta nemendur hafið nám strax eftir forskóla séu þeir með hljóðfæri við hæfi.

Harmonikunámið fer fram í einkatímum, en að auki fá nemendur ýmis tækifæri til samspils. Kennt er eftir aðalnámsskrá tónlistarskóla og harmonikunemendur byrja að sækja tónfræðitíma þegar kennarar telja það tímabært.

Hér má sjá nokkur skemmtileg tóndæmi:

Sjóræningjatónlist! Beint úr Pirates of the Caribbean.

Hér má sjá frábæran harmonikuleikara spila Libertango eftir Astor Piazzola með góðum félögum.

Hér má sjá Finnann Tatu Kantomaa spila þegar hann var ungur strákur. Hann bjó svo á Íslandi í mörg ár! 

Hér má heyra Malaguena, sem byggir á tónlistarhefð frá Venezuela.

Svo er nú líka hægt að spila Queen lög með vinum sínum á harmoniku!