Hrafn Heiðar Guðmundsson

Hrafn Heiðar (Krummi) hóf tónlistarnám 5 ára gamall og lærði á selló í Tónlistarskólanum á Akureyri. Þar byrjaði hann hjá Paweł Panasiuk, var lengst af hjá Ásdísi Arnardóttur en síðasta veturinn lærði hann líka hjá Steinunni Arnbjörgu Stefánsdóttur. Þaðan útskrifaðist hann með framhaldspróf árið 2019. Í millitíðinni fór hann í skiptinám til Austurríkis veturinn 2017-18 þar sem hann tók selló tíma í Vín hjá Anastasia Piehslinger. Hann stundaði frekara nám við Listaháskóla Íslands í hljóðfæraleik með áherslu á kennslufræði og útskrifaðist þaðan vorið 2023 með bakkalárgráðu. Þar lærði hann undir handleiðslu Sigurðar Bjarka Gunnarssonar, sem leikur með Sinfóníuhljómsveit Íslands og lærði í Manhattan School of Music og Julliard-skólanum í New York. Krummi hefur sótt ýmsa tíma og masterklassa, m.a. hjá Gunnari Kvaran, Sigurgeiri Agnarsyni, Guðnýju Guðmundsdóttur, Darret Atkins, Henrik Brendstrup, Henry-David Varema o.fl..

Hann stoppaði stutt í Hollandi og lærði í Fontys Academy of the Arts í Tilburg þar sem hann sótti tíma hjá Paul Uyterlinde og spilaði með strengjakvartettnum Allostasis og Brabant hljómsveit ásamt því að taka þátt í ýmsum þverfaglegum verkefnum þar sem hann vann m.a. með leikurum. Hann hefur tekið þátt í ýmsum spunanámskeiðum og verkefnum í skapandi tónlistarmiðlun m.a. í den Bosch hjá Maya Fridman, í LHÍ hjá Gunnari Ben, jass-spuna hjá Sigurði Flosasyni og á hjúkrunarheimilinu Grund með Magneu Tómasardóttur. Hann hefur einnig tekið þátt í ýmsum hátíðum og verkefnum, t.d. minningartónleikum Erlings Blöndal Bengtssonar, Harpa International Academy og Crossing Strings í Tallinn. Hann hefur spilað með ýmsum hljómsveitum, eins og Sinfóníuhljómsveit Norðurlands, SinfóAust, Ungsveit Sinfóníuhljómsveitar Íslands, Sinfóníuhljómsveit Gunnsteins Ólafssonar, Brabant Orchestra í Hollandi o.fl.. Einnig hefur hann komið fram í kammerhópum í Menningarhúsinu Hofi, Listasumari á Akureyri, EAMT í Tallinn, Skálholti og í kirkjum bæði á Íslandi og Hollandi. 

Utan tónlistarinnar lærir Krummi þroskaþjálfafræði við HÍ og starfar við félagsþjónustu hjá Múlaþingi. Krummi kennir við Tónlistarskólann á Egilsstöðum á selló og gítar ásamt því að kenna forskólahópa.