17. júní á Egilsstöðum

17. júní var haldinn hátíðlegur á Egilsstöðum með öllu tilheyrandi í blíðskaparveðri og það vantaði að sjálfsögðu ekki tónlistina! Lúðrasveit Fljótsdalshéraðs lék í skrúðgöngu frá kirkjunni og yfir í Tjarnargarð og lék svo tvö lög á hátíðarsvæðinu, en lúðrasveitin samanstendur af nemendum og kennurum í tónlistarskólum Múlaþings auk annarra blásturshljóðfæraleikara af svæðinu. Einnig lék Ína Berglind Guðmundsdóttir tvö af sínum frumsömdu lögum á hátíðahöldunum með glæsibrag, en hún er nemandi bæði í Tónlistarskólanum á Egilsstöðum og Tónlistarskólanum í Fellabæ. Þetta var afar ánægjulegur dagur í alla staði og afskaplega gaman fyrir okkur að eiga okkar fulltrúa í þessum flottu hátíðahöldum.