Að loknum vortónleikum

Tónlistarskólinn á Egilsstöðum hélt vortónleika sína dagana 9. og 11. maí. Haldnir voru tvennir tónleikar hvorn dag þannig að alls var um ferna tónleika að ræða og dugar ekki minna í skóla sem telur orðið 170 nemendur.

Það er ljóst að ekki geta allir fengið að spila á vortónleikum en við reynum að gefa öllum nemendum tækifæri til að koma fram opinberlega og má til dæmis nefna að nemendur eru að spila á tónfundum, á sjúkrahúsinu en þangað förum við mánaðarlega, 1. maí en við höfum undanfarin ár séð um tónlistarflutning fyrir AFL, og öðrum uppákomum.

Skemmst er frá að segja að þessir tónleikar voru hver öðrum skemmtilegri og nemendur stóðu sig með prýði.

Nú tekur bara við venjuleg kennsla það sem eftir er mánaðarins en síðasti kennsludagur er 27. maí og skólaslit verða í sal Egilsstaðaskóla þriðjudaginn 31. maí og hvetjum við alla nemendur og kennara til að koma á skólaslitin.