Allt öðruvísi tónleikar

Sunnudaginn 10. maí hélt stúlknakórinn Liljurnar stórtónleika í Valaskjálf undir stjórn Margrétar Láru Þórarinsdóttur. Þar fluttu þær popplög úr ýmsum áttum, m.a. lög með Adele, Cranberries, Bubba, Dawid Bowie og lög úr Rocky Horror.

Stúlkunum til aðstoðar voru fjórir frábærir tónlistarnemendur úr Tónlistarskóla Hornafjarðar en Liljurnar fóru einmitt á Höfn og héldu tónleika með þeim þar 2. maí. Skemmtilegt að geta haft svona samstarfsverkefni.

Einnig kom fram piltasönghópurinn Halir Baldurs en þeir hafa verið að æfa up á síðkastið undir stjórn Margrétar Láru og vonandi verður framhald á því næsta vetur.

Tónleikarnir heppnuðust mjög vel og gaman að sjá hversu mikill metnaður var lagður í þá, einsöngvarar stóðu sig með prýði og kórarnir alveg frábærir. Hljómsveitin einnig. Mætingin var líka mjög góð, eitthvað vel á annað hundrað lögðu leið sína í Valaskjálf og skemmtu sér konunglega.