Baráttudagur verkalýðsins

Nemendur og kennarar Tónlistarskólans spiluðu og sungu á samkomu hjá AFLi starfsgreinafélagi á baráttudegi verkalýðsins, þriðjudaginn 1. maí síðastliðinn. Kristófer Gauti Þórhallsson og Elín Helga Guðgeirsdóttir sungu lög er hæfðu tilefninu við undirleik söngkennara síns, Margrétar Láru Þórarinsdóttur. Lúðrasveit Fljótsdalshéraðs spilaði einnig á samkomunni, en meðal meðlima hennar eru bæði nemendur og kennarar Tónlistarskólans á Egilsstöðum og í Fellabæ auk annara blásturshljóðfæraleikara af Fljótsdalshéraði. Það var margt um manninn á samkomunni og var hraustlega tekið undir í fjöldasöng. Það er gleðilegt að geta boðið upp á fjölbreytt tónlistaratriði við ýmis tilefni í samfélaginu og þökkum við AFLi fyrir góðar mótttökur.