Blásarasveitin á ferðalagi

Blásarasveit Tónlistarskólans á Egilsstöðum er skipuð átta hljóðfæraleikurum, bæði nemendum og kennurum Tónlistarskólans og einnig einu foreldri nemanda í skólanum. Sveitin hefur starfað í nokkur ár og spilar reglulega, t.d. er hún orðinn fastur punktur í 1. maí hátíðahöldunum.

Sveitin tók þátt í Einarsvöku í Heydalakirkju í Breiðdal 14. maí síðastliðinn, uppstigningardag. Einarsvaka er hátíð sem haldin er í Heydalakirkju ár hvert til að minnast sr. Einars Sigurðssonar sem var prestur í Heydalakirkju frá 1590 til 1626. Einar er eitt afkastamesta sálmaskáld Íslendinga og er þekktastur fyrir að hafa ort sálminn Nóttin var sú ágæt ein en að auki liggur aragrúi annarra sálma og ljóða eftir Einar.

Blásarasveitin lék með kirkjukór Stöðvarfjarðar- og Heydalakirkna sem leiddi söng. Einnig frumflutti Sigurlaug Björnsdóttir sönglag við einn af sálmum sr. Einars.

Farið var með bíl yfir Breiðdalsheiði sem var nýlega orðin auð og var þetta fyrsta heimsókn sumra hjóðfæraleikaranna, þeirra yngri, í Breiðdalinn og fyrsta ferð þeirra yfir heiðina. Já maður lærir sko ýmislegt í Tónlistarskólanum.