Blásaratónleikar í Dyngju

Þriðjudaginn 27. nóvember hélt Tónlistarskólinn á Egilsstöðum sína mánaðarlegu tónleika í hjúkrunarheimilinu Dyngju. Í þetta skiptið voru nemendur á blásturshljóðfæri í aðalhlutverki og leikið var á þveflautu, klarínettu, saxófón, trompet og básúnu. Skólahljómsveit Fljótsdalshéraðs spilaði og í tveimur atriðum mátti hlýða á samspil tveggja nemenda, þar sem annar nemandinn lék á blásturshljóðfæri og hinn á píanó. Nokkrir nemendanna voru að stíga á svið sem einleikarar í fyrsta sinn og var mjög ánægjulegt að sjá hvað þeim gékk vel. Íbúar tóku vel á móti nemendunum eins og ávallt. Síðustu tónleikar skólans í Dyngju á árinu 2018 verða svo þriðjudaginn 11. desember.