Vortónleikar Lúðrasveitar Fljótsdalshéraðs

Lúðrasveit Fljótsdalshéraðs hélt fjörlega og skemmtilega tónleika í Tehúsinu sunnudaginn 29. maí kl. 14:00. Á efnisskrá var ýmiskonar tónlist, ekta lúðrasveitarmars, ragtime, djass, kvikmyndatónlist, söngleikjatónlist og popptónlist. Tónleikarnir voru vel sóttir og myndaðist mjög góð stemmning á þeim. Tónlistarskólinn er stoltur samstarfs- og stuðningsaðili Lúðrasveitarinnar, en í henni leika nemendur tónlistarskólans og kennarar ásamt ýmsum öðrum íbúum svæðisins sem spila á blásturshljóðfæri. Lúðrasveitin er alltaf að leita að nýjum meðlimum og það vantar fleira fólk á öll hljóðfæri. Það er því meira en velkomið að hafa samband ef þið hafið áhuga á að spila með okkur í þessari frábæru sveit!