Fullorðnir nemendur í tónlistarskólunum

Bæjarstjórn samþykkti á fundi sínum þann 1. mars síðastliðinn að leyfa tónlistarskólum á Fljótsdalshéraði að kenna fullorðnum nemendum á ný. Í sparnaðarskyni eftir hrun var tekið fyrir það að fullorðnum væri kennt við skólann en miðað við breyttar forsendur, t.d. að nú fást greiðslur frá ríkinu til stuðnings við tónlistarnám lengra kominna nemenda, var kominn tími á að sú ákvörðun væri endurskoðuð. Við fögnum mjög þessari ákvörðun og teljum hana vera framfaraskref fyrir skólann og samfélagið á Fljótsdalshéraði, sem nýtur góðs af þeirri þekkingu sem fullorðnir nemendur afla sér í tónlistarskólunum með fjölbreyttum hætti, meðal annars í kóra- og hljómsveitastarfi.