Fyrstu tónleikar ársins í Dyngju

Nemendur Tónlistarskólans lögðu leið sína í hjúkrunarheimilið Dyngju þriðjudaginn 29. janúar og héldu þar tónleika fyrir íbúa. Leikið var á píanó, gítar, fiðlu og selló og var efnisskráin fjölbreytt og skemmtileg. Á tónleikunum mátti meðal annars heyra verk sem píanónemendur eru að undirbúa fyrir Chopin píanókeppnina í Reykjavík í mars. Íbúar tóku vel á móti nemendum og heyra mátti á þeim að þeir voru mjög ánægðir með tónleikana og að þeim hafi þótt krakkarnir vera flinkir að spila. Nemendur voru kennurum sínum til sóma. Tónlistarskólinn verður síðan með tónleika í Dyngju í hverjum mánuði það sem eftir er af skólaárinu.