Gospelmessa 27. janúar

Gospelmessa í Egilsstaðakirkju er einn af föstum liðum í starfi Stúlknakórsins Liljanna, sem starfar nú undir stjórn Hlínar Pétursdóttur Behrens. Fyrsta gospelmessa ársins fór fram 27. janúar og fluttu Liljurnar nokkur lög raddsett af Óskari Einarssyni, tónlistarstjóra Fíladelfíu, sem er kunnur á Austurlandi fyrir bæði gospelnámskeið og tónleika. Góð mæting er í gospelmessurnar og iðulega myndast mikil og góð stemmning. Liljurnar stóðu sig vel að vanda og skiluðu sveiflunni af krafti með dyggri aðstoð Tryggva Hermannssonar píanóleikara, sem býr fyrir sérlegri kunnáttu og næmni fyrir þessum tónlistarstíl. Næsta Gospelmessa verður haldin í apríl og stefna Liljurnar að tónleikum í vor.