Heiðurstónleikar Bubba Morthens

Tónleikafélag Austurlands hélt tónleika til heiðurs Bubba Morthens í hátíðarsal gamla Alþýðuskólans á Eiðum þann 12. september síðastliðinn til styrktar geðheilbrigðismálum á Austurlandi. Félagið var stofnað 2017 til þess að efla tónleikahald á svæðinu og styðja góð málefni. Tónleikarnir voru afar vel sóttir og var mikið vandað til þeirra, en á þeim mátti heyra þekktustu slagara Bubba auk laga sem sjaldnar eru spiluð. Við erum stolt af því að á tónleikunum komu fram fyrrverandi og núverandi nemendur Tónlistarskólans á Egilsstöðum auk kennara skólans. Allir þessir flytjendur stóðu sig afskaplega vel og greinilegt að áheyrendur nutu dagskrárinnar. Til hamingju Tónleikafélag Austurlands!