Heimsókn Blásarakvintetts Reykjavíkur

Laugardaginn 25. apríl var Blásarakvintett Reykjavíkur á tónleikaferðalagi um Austurland. Ferðalagið hófst hér á Egilsstöðum þar sem þau héldu sérstaka barnatónleika.

Blásarakvintettinn skipa þau Hallfríður Ólafsdóttir, Daði Kolbeinsson óbóleikari, Einar Jóhannesson klarínettuleikari, Darri Mikaelsson fagottleikari og Joseph Ognibene hornleikari. Blásarakvintettinn var stofnaður árið 1981, og hafa þau leikið á tónleikum víðsvegar um heiminn, og spilað inn á fjölda geisladiska.

Við má búast að veðrið hafi sett smá strik í reikninginn, á aðeins öðruvísi hátt en venjulega, því það var rjómablíða þennan dag og þó sundlaugin í næsta húsi hafi verið troðin, var því miður ekki alveg eins góð mæting á tónleikana. En það kom nú ekkert að sök, og fengu þeir sem mættu úrvals tónleika.

Kvintettinn spilaði úrval verka sem hafa annaðhvort verið samin fyrir blásarakvintett eða útsett fyrir hljóðfæraskipan hans. Á efnisskránni mátti meðal annars heyra gamla dansa eftir Ferenc Farkas, Bleika Pardusinn, Bagatellur eftir Ligeti og The Entertainer eftir Scott Joplin. Hápunktur tónleikanna var þó eflaust  Opus Number Zoo eftir Luciano Berio, þar sem hljóðfæraleikararnir sögðu litlar sögur af dansandi hænum, gömlum músum og öfundsjúkum köttum á milli þess sem þau spiluðu tónlistina.

Yngri hluti tónleikagestanna var alveg upprifin, erfitt að segja hvort þau voru hrifnari af þessu stóra skrítna hljóðfæri sem fagottið er, eða af pínulitlu, svörtu þverflautunni sem hún Hallfríður spilaði stundum á, en það voru ánægðir tónleikagestir sem héldu út í sólina, eftir að hafa fengið að spjalla við þau Haffí, Daða, Einar, Darra og Joe, og skoða hljóðfærin þeirra eftir tónleikana.