Heimsókn forseta og forsetafrúar

Forseti Íslands og forsetafrú heiðruðu íbúa Fljótsdalshéraðs með opinberri heimsókn í síðustu viku. Fengu forsetahjónin að hlýða á hljóðfæraleik og söng nemenda úr Tónlistarskólanum á Egilsstöðum og Tónlistarskólanum í Fellabæ. Miðvikudagskvöldið 12. september var kvöldskemmtun í Valaskjálf þar sem þrír nemendur úr hvorum skóla komu fram og tóku forsetinn og forsetafrú ásamt öðrum gestum flutningnum afar vel. Í hádeginu þann 13. september sungu svo nokkrar stúlkur úr stúlknakórnum Liljunum fyrir forsetahjónin í Egilsstaðaskóla. Það var afar ánægjulegt að fá þessa heimsókn hingað á Hérað og vitaskuld mikill heiður fyrir nemendur okkar að fá að koma fram við þetta hátíðlega tilefni.