Hljóðfærakynning

Kennarar Tónlistarskólans fengu það skemmtilega verkefni að kynna allskonar hljóðfæri fyrir nemendum mánudaginn 12. maí. Nemendur í öðrum, þriðja og fjórða bekk fengu að koma á kynninguna, sem fór fram í sal Egilsstaðaskóla. Þeir fengu að kynnast blokkflautum í ýmsum stærðum, þverflautu, klarínettu, saxófón, trompet, básúnu, túbu, fiðlu, víólu, selló, kontrabassa, píanói, kassagítar, rafmagnsgítar, rafmagnsbassa og söngröddinni. Nemendurnir voru mjög áhugasamir og fannst greinilega sérstaklega gaman að heyra kennarana spila lög á hin ýmsu hljóðfæri. Vonandi hafa einhverjir séð eitthvað þarna sem vekur áhuga, en til upplýsingar er hægt að sækja um í Tónlistarskólanum hvenær sem er á heimasíðu skólans!