Hljóðfærakynning í Egilsstaðaskóla

Þann 11. maí héldu kennarar Tónlistarskólans hljóðfærakynningu fyrir nemendur í 2., 3. og 4. bekk Egilsstaðaskóla. Kennararnir kynntu hljóðfærafjölskyldurnar og sýndu og spiluðu á fjölbreytt úrval tréblásturs-, málmblásturs-, strengja-, ásláttar- og hljómborðshljóðfæra auk þess að söngröddin var skoðuð. Nemendur voru áhugasamir, skemmtu sér vel og lærðu mikið. Á kynningunni voru ýmis minnisverð augnablik. Þegar Berglind sýndi nemendum bassablokkflautu fór kliður um salinn, enda ekki á hverjum degi sem fólk fær að sjá slíkan undragrip. Charles náði upp góðri stemmningu þegar hann kynnti fjölbreytt úrval slagverks- og strengjahljóðfæra og Máni spilaði óskalagið Thunderstruck með miklum tilþrifum á rafmagnsgítar við góðar undirtektir!