Hljóðfærakynning í Egilsstaðaskóla

Tónlistarskólinn hélt sína árlegu hljóðfærakynningu fyrir nemendur í 2.-4. bekk Egilsstaðaskóla föstudaginn 20. maí. Þá sýndu kennarar nemendum ýmis hljóðfæri, útskýrðu svolítið hvernig þau virka og spiluðu á þau. Þetta gerum við bæði til þess að fræða nemendur almennt um hljóðfæri og gefa þeim tækifæri til þess að velta fyrir sér hvort þeir vilji ef til vill læra á eitthvað af því sem er í boði hjá okkur í tónlistarskólanum. Nemendurnir voru virkilega áhugasamir og var gaman að sýna þeim fjölbreytt úrval hljóðfæra úr öllum hljóðfærafjölskyldum: söngrödd, strengjahljóðfæri, tréblásturshljóðfæri, málmblásturshljóðfæri, hljómborðshljóðfæri og ásláttarhljóðfæri. Við þökkum Egilsstaðaskóla kærlega fyrir góðar móttökur.