Hljóðfærakynning í Egilsstaðaskóla

Tónlistarskólinn hélt sína árlegu hljóðfærakynningu fyrir nemendur í 2.-4. bekk Egilsstaðaskóla fimmtudaginn 4. maí. Nemendur fengu þá að sjá og heyra hin ýmsu hljóðfæri, en kennararnir sögðu frá hljóðfærunum sínum og spiluðu á þau. Það var mikið fjör þegar Frikki rokkstjarna spilaði Thunderstruck á rafmagnsgítar og nemendur voru duglegir að prófa raddirnar sínar með Möggu Láru. Wes kynnti líka slagverkshljóðfæri og málmblásturshljóðfæri, Mairi strengjahljóðfæri og Sóley tréblásturshljóðfæri fyrir nemendum. Það er afskaplega gaman fyrir okkur að fá að kynna skemmtilega dótið okkar fyrir nemendum og vonandi eru nemendur margs vísari. Við þökkum Egilsstaðaskóla kærlega fyrir að taka á móti okkur!