Hrekkjavökuhryllingur á góu

Sviðslistahópurinn Austuróp, sem flytur óperutónlist og setur á svið söngtónleika á Austurlandi, hélt sína fyrstu tónleika dagana 13. og 14. mars. Fyrri tónleikarnir voru í Tehúsinu á Egilsstöðum og þeir seinni í Tónlistarmiðstöð Austurlands á Eskifirði. Dagskráin innihélt lög sem tengja mátti við hrekkjavöku og hrylling, enda áttu þessir tónleikar upphaflega að vera í október en frestuðust eins og svo margir viðburðir hafa gert undanfarið. Hlín Pétursdóttir Behrens, söngkennari við Tónlistarskólann, hafði veg og vanda að verkefninu og núverandi og fyrrverandi nemendur Tónlistarskólans voru áberandi á tónleikunum auk þess að Margrét Lára Þórarinsdóttir, söngkennari, heillaði áhorfendur með glæstum söng sínum.