Ína Berglind í Egilsbúð

Það er ekki á hverjum degi sem nemandi Tónlistarskólans hitar upp fyrir heimsfrægan tónlistarmann, en það gerðist einmitt síðasta laugardagskvöld í Egilsbúð í Neskaupstað. Ína Berglind Guðmundsdóttir steig þar á svið og hitaði upp fyrir Nönnu, sem gerði garðinn frægan á heimsvísu með hljómsveitinni Of Monsters and Men en hefur nú hafið sólóferil. Ína Berglind flutti nokkur frumsamin lög, þar af eitt alveg glænýtt, með glæsibrag eins og henni er von og vísa. Áhorfendur kunnu greinilega að meta flutninginn og henni var gríðarlega vel tekið. Við erum að sjálfsögðu öll afar stolt af Ínu og fylgjumst spennt með henni áfram!