Ína Berglind sigrar Samfés

Ína Berglind Guðmundsdóttir, sem leggur stund á nám bæði við Tónlistarskólann á Egilsstöðum hjá Margréti Láru Þórarinsdóttur og Tónlistarskólann í Fellabæ hjá Øysteini Magnúsi Gjerde, gerði sér lítið fyrir og sigraði söngkeppni Samfés, sem fram fór í Laugardalshöll þann 6. maí. Ína keppti fyrir hönd félagsmiðstöðvarinnar Nýungar og steig fyrst allra á svið með frumsamið lag, Tilgangslausar setningar. Flutningurinn á laginu var glæsilegur og lagið sjálft er alveg frábært. Við erum afar stolt af Ínu Berglindi og óskum henni og félagsmiðstöðinni Nýung innilega til hamingju með sigurinn. Við hlökkum svo að sjálfsögðu til að fylgjast með henni áfram á tónlistarbrautinni!