Íslenska einsöngslagið

Fimmtudaginn 1. desember voru haldnir söngtónleikar í Egilsstaðakirkju undri yfirskriftinni „Íslenska einsöngslagið“. Þetta voru tónleikar númer tvö í tónleikaröðinni „Ljóðahátíð“ sem eru á vegum Austuróps og eru helgaðir ljóðasöngvum en, seinni tveir tónleikarnir verða haldir á vormisseri 2023. Það átti vel við að halda þessa tónleika á fullveldisdaginn 1. desember, sem er einnig dagur íslenskrar tónlistar. Flytjendur á tónleikunum voru núverandi og fyrrum nemendur Tónlistarskólans á Egilsstöðum og Tónlistarskólans í Fellabæ, en við báða skólana eru öflugar söngdeildir. Söngvurunum sjö til halds og trausts voru píanóleikararnir Anda Steina og Sándor Kerekes. Fluttar voru sígildar sönglagaperlur en einnig nýrri verk og nokkur þeirra við ljóð eftir Þórarinn Eldjárn og vöktu þau mikla kátínu meðal tónleikagesta, eins og við mátti búast. Flytjendum var vel fagnað í lokin og hver veit nema þetta verði árlegur viðburður því af nógu er að taka í íslensku sönglagasafni.