Jólatónleikar á Dyngju

Nemendur og kennarar heimsóttu Dyngju þriðjudaginn 17. desember og fluttu heilmikið af jólatónlist fyrir íbúa og aðra gesti. Var efnisskrá þessara tónleika nokkuð lengri og veglegri en á hefðbundnum tónleikum á hjúkrunarheimilinu, enda nemendur búnir að vera mjög duglegir að æfa allskyns jólalög. Á tónleikunum léku nemendur á píanó, selló og ukulele auk þess að syngja ýmist saman og í sitthvoru lagi. Lokaatriðið var síðan saxófónkvartett með hið stórskemmtilega lag „I Want a Hippopotamus for Christmas“, en hver myndi ekki vilja fá svoleiðis í jólagjöf? Nemendur stóðu sig frábærlega að vanda. Við þökkum íbúum og starfsfólki Dyngju kærlega fyrir móttökurnar!