Jólatónleikar í Tjarnarskógi

Kennarar og nemendur Tónlistarskólans lögðu leið sína á leikskólana Skógarland og Tjarnarland mánudaginn 8. desember til þess að spila jólalög fyrir yngstu nemendurna á Egilsstöðum. Við heimsóttum Skógarbæ um morguninn og Tjarnarbæ upp úr hádegi. Áheyrendurnir ungu stóðu sig frábærlega sem tónleikagestir og það var virkilega gaman að fara í þessa heimsókn. Tónlistarnemarnir stóðu sig ekki síður vel og voru frábærar fyrirmyndir. Leikskólabörnin fengu að sjá leikið á fjölbreytt úrval hljóðfæra: blokkflautu, þverflautu, klarinett, saxófón, básúnu, ukulele, píanó, og slagverk auk söngs. Við þökkum leikskólanum Tjarnarskógi fyrir frábærar móttökur og hlökkum til að fá elsta árganginn í heimsókn í vor!