Kvennaverkfall

Föstudaginn 24. október fór fram kvennaverkfall, á 50 ára afmæli kvennaverkfallsins 1975. Á Egilsstöðum var kröfuganga frá N1 upp í Valaskjálf, þar sem hlýða mátti á ræður og tónlistaratriði. Eins og við svo mörg tilefni kom tónlist mikið við sögu þennan dag og er gaman að segja frá því að Ína Berglind Guðmundsdóttir, nemandi við Tónlistarskólann á Egilsstöðum, kom fram á viðburðinum í Valaskjálf og flutti þar tvö af sínum eigin lögum með glæsibrag. Ína er flinkur lagahöfundur og flytjandi og er farin að stunda list sína þó nokkuð sjálfstætt í samfélaginu hér. Gestir viðburðarins tóku flutningnum vægast sagt vel!