Landsmót SÍSL

Tónlistarskólinn á Egilsstöðum sendi um helgina nemendur á C-sveita landsmót Sambands íslenskra skólalúðrasveita á Akureyri. Var þetta mikil hátíð og hátt í 200 nemendur víðsvegar af landinu mættu til leiks. Nemendurnir æfðu í tveimur risastórum hljómsveitum og fluttu lög á borð við Call Me Maybe og hina svínslega erfiðu Þursafóníu, sem byggð er á lögum með Þursaflokknum, en fyrir utan hljómsveitaræfingar var líka boðið upp á kennslu í þjóðdönsum. Hljómsveitirnar léku á tónleikum sunnudaginn 16. febrúar í Hamraborg í Hofi og stóðu sig alveg frábærlega. Var þetta í alla staði frábær skemmtun og afar lærdómsrík helgi fyrir þessa öflugu nemendur.