Landsmót SÍSL 2017

Á hverju ári heldur Samband Íslenskra Skólalúðrasveita landsmót fyrir nemendur skólalúðrasveitanna. Annað hvert ár er mót haldið fyrir yngri nemendur, og hitt árið fyrir elstu nemendur skólalúðrasveitanna. Í ár var komið að elstu nemendunum, sem söfnuðust saman á Akranesi helgina 3.-5. febrúar.

Dagskrá mótanna er ætíð metnaðarfull og ekkert var slegið undan í ár. Það voru um 300 nemendur á mótinu, á aldrinum 13-20 ára, og var dagskráin mótuð eftir aldri og áhuga elstu nemendanna. Á eldri mótunum æfa hljóðfærahóparnir saman nokkrum sinnum og svo eru haldnir stórir tónleikar þar sem hver hópur kemur fram. Auk samspilsæfinganna eru fyrirlestrar og námskeið, pub-quiz og ball.

Í ár slógum við, sem komum frá Austurlandi, okkur saman í einn hóp. Við lögðum af stað á fimmtudegi og fórum á Sinfóníutónleika um kvöldið. Á föstudeginum fórum við í heimsókn í bæði Listaháskólann og Tónlistarskólann í Reykjavík, þar sem við fengum að skoða skólana og kynningar á námi og starfi skólanna, áður en við fórum til Akraness.

Við fengum góða gesti á mótið sem kynntu fyrir okkur skóla, hljómsveitir og stundum bara sjálfa sig. Veigar Marinósson kom og sagði okkur frá sínu starfi í Los Angeles, þar sem hann starfar sem kvikmyndatónskáld. Ari Bragi Kárason sagði okkur frá því hvernig hann fór að því að verða einn besti trompetleikari landsins, auk þess að setja Íslandsmet í hlaupum á milli tónleika. Sigrún Kristbjörg Jónsdóttir sagði okkur aðeins frá sínum ferðalögum um heiminn og kenndi sambatónlist. Við fengum jógahugleiðslu og töfrasýningu. Það er gaman að segja frá því að nánast allir gestir sem komu með fyrirlestra og námskeið eru lúðrasveitafólk, og hafa spilað með lúðrasveitum í styttri og lengri tíma.

Á laugardagskvöldinu var pub-quiz, þar sem hópurinn okkar rúllaði upp spurningunum og var aðeins einu stigi frá sigri! Diskótekið Dísa og MC Gauti héldu svo uppi stuðinu fram undir miðnætti.

Sunnudagurinn bar með sér ný ævintýri: við fengum kynningu á nýstofnuðum tónlistarmenntaskóla, á Ungsveit Sinfóníunnar og fyrirlestur um hvernig megi hugsa sem best um hljóðfærin, svo þau bili sem minnst.

Mótið endaði svo á hápunktinum, tónleikum þar sem allir 300 þátttakendur komu fram með 7 mismunandi hljómsveitum, ásamt því að enda á því að spila öll saman í lokin.

Hér fyrir neðan má sjá vídeó með myndum og myndbrotum frá mótinu.

https://www.youtube.com/watch?v=Qp4lrIwTiDU&feature=youtu.be