Leikfélag Fljótsdalshéraðs 50 ára

Dvergarnir úr Skilaboðaskjóðunni ásamt hljómsveit

Um helgina var blásið til mikillar tónlistarveislu í Valaskjálf til þess að fagna því að Leikfélag Fljótsdalshéraðs er nú 50 ára. Dagskráin var flutt laugardagskvöldið 12. nóvember kl. 20:30 og aftur á sunnudeginum kl. 16:00. Nemendur og kennarar Tónlistarskólans tóku virkan þátt í hátíðahöldunum og fluttu lög úr þó nokkrum af þeim leiksýningum sem Leikfélagið hefur sett upp í gegn um árin. Nemendur skólans, í góðu samstarfi við nemendur í Tónlistarskólanum í Fellabæ, fluttu lög úr Kardimommubænum og Skilaboðaskjóðunni. Lúðrasveit Fljótsdalshéraðs, sem æfir í skólanum og sem bæði nemendur og kennarar skólans eru virkir þáttakendur í, lék lag úr Fiðlaranum á Þakinu. Tveir af söngnemendum skólans sungu einnig lag úr Fiðlaranum ásamt núverandi og fyrrverandi kennurum skólans. Stúlknakórinn Liljurnar söng lög úr Galdrakarlinum í Oz, Karíusi og Baktusi og Gullna hliðinu. Kennarar skólans og nemendur komu einnig að flutningi á lögum úr My Fair Lady, Túskildingsóperunni, Don Kíkóta, Ég er hættur! Farinn!, Saumastofunni, Hér Stóð Bær og Þrek og Tár. Það er því óhætt að segja að Tónlistarskólinn hafi heldur betur látið að sér kveða í þessari stórskemmtilegu afmælisveislu. Við þökkum Leikfélagi Fljótsdalshéraðs fyrir samstarfið um þetta verkefni um leið og við óskum þeim innilega til hamingju með árin 50!