Liljurnar í gospelmessu

Stúlknakórinn Liljurnar lét ljós sitt skína við gospelmessu í Egilsstaðakirkju sunnudaginn 10. nóvember undir stjórn Hlínar Pétursdóttur Behrens og sá Tryggvi Hermannsson um meðleik. Gospelmessan hefur fest sig í sessi sem fastur liður í starfi Liljanna og er alltaf skemmtileg. Góður rómur var gerður að söng stúlknanna í kórnum. Þó nokkur endurnýjun hefur verið í hópnum undanfarið og eru nýir meðlimir alltaf velkomnir í Liljurnar, sem er samstarfsverkefni tónlistarskólanna og grunnskólanna á Fljótsdalshéraði, kirkjunnar og Menntaskólans á Egilsstöðum. Þátttakendur eru stúlkur frá 8. bekk og til rúmlega tvítugs. Kórinn æfir á fimmtudögum kl. 16:30 í Egilsstaðakirkju og er þátttaka ókeypis.