Liljurnar syngja við messur

Liljurnar hafa verið mjög duglegar að koma fram á vorönn við hin ýmsu tækifæri. Meðal þeirra var gospelmessa í Egilsstaðakirkju þar sem Liljurnar, undir stjórn Hlínar Pétursdóttur Behrens, sungu þekkt sálmalög í bland við gospeltóna með dyggum stuðningi Tryggva Hermannssonar píanóleikara. Liljurnar lögðu einnig leið sína í hjúkrunarheimilið Dyngju sunnudaginn 5. maí, þar sem þær sungu við messu fyrir íbúa. Þar sungu þær ættjarðarlög, sálma og gospelsöngva ásamt píanóleikaranum Tryggva Hermannssyni. Söngurinn ómaði um rými og ganga Dyngju og var gerður góður rómur að söng hópsins. Stúlknakórinn Liljurnar er nú kominn í sumarfrí en þær hefja aftur æfingar í september.