List án landamæra

Listhátíðin List án landamæra er hugsuð til að brjóta niður múra af ólíkum toga  milli listamanna. Þessir múrar geta m.a. verið tilkomnir vegna aldursmunar, fötlunar eða annars. Tónlistarskólinn á Egilsstöðum hefur undanfarin þrjú ár tekið þátt í hátíðinni og í ár var þema hátíðarinnar hreindýr.

Nemendur skólans fluttu tónverk eftir Charles Ross sem hann samdi við myndina Hreindýr á Austurlandi sem Hjalti Stefánsson klippti saman. Einnig fluttu nemendur skólans Hreindýravísur Hákons Aðalsteinssonar ásamt leikskólabörnum og fötluðum einstaklingum úr Stólpa sem Margrét Lára Þórarinsdóttir hefur verið að leiðbeina í tónlist.

Hátíðin var haldin í Valaskjálf og að henni lokinni tóku nokkrir nemendur sig til og fóru hringferð um bæinn undir stjórn Berglindar Halldórsdóttur og Margrétar Láru Þórarinsdóttur og fluttu tónlist á ýmsum stöðum þar sem vænta mátti að fólk væri á ferð. 

Það er alltaf gaman að taka þátt í svona verkefni og hafi þeir sem að því standa miklar þakkir og takk fyrir að fá að vera með.