Listamarkaður í Sláturhúsinu

Tónlistarnemendur eru ennþá á ferð og flugi og verða það alveg fram að jólafríi! Laugardaginn 14. desember var haldinn glæsilegur myndlistarmarkaður auk skíðamarkaðar í Menningarmiðstöð Fljótsdalshéraðs-Sláturhúsinu með piparkökum, mandarínum og jólaglöggi. Nemendur Tónlistarskólans á Egilsstöðum mættu þangað að sjálfsögðu galvaskir og sungu og spiluðu fyrir gesti og gangandi. Á efnisskrá var fyrst og fremst jólatónlist og fengu áheyrendur að njóta söngs og þverflautuleiks. Að auki fór fram frumflutningur á glænýju slagverkstónverki eftir yngri slagverkssamspilshóp Tónlistarskólans, en verkið ber titilinn Homer Simpson. Myndaðist notaleg og skemmtileg stemmning við þetta og var flutningi nemendanna vel tekið. Við þökkum Sláturhúsinu kærlega fyrir samstarfið!