Nýr aðstoðarskólastjóri við Tónlistarskólann

Berglind Halldórsdóttir hefur verið ráðin aðstoðarskólastjóri við Tónlistarskólann á Egilsstöðum frá 1. ágúst næstkomandi. Berglind nam við Háskólann í Stavanger og lauk þaðan bakkalárgráðu í klarínettuleik vorið 2009, diplóma í tónlistarkennslufræðum vorið 2011 og meistaragráðu í klarínettuleik vorið 2012. Hún hefur starfað sem tónlistarkennari síðan 2002, en hefur verið starfandi við Tónlistarskólann á Egilsstöðum frá árinu 2013 þar sem hún hefur kennt blásturshljóðfæraleik, tónfræði og forskóla auk þess að stjórna Skólahljómsveit Fljótsdalshéraðs. Berglind situr í stjórn Lúðrasveitar Fljótsdalshéraðs og Sinfóníuhljómsveitar Austurlands og hefur farsæla reynslu af stjórnun ýmissa tónlistartengdra verkefna við Tónlistarskólann. Við bjóðum Berglindi innilega velkomna í þetta starf!