Nýr söngkennari við skólann-örfá pláss laus

Nýr söngkennari er tekinn til starfa við Tónlistarskólann og leysir Margréti Láru af í eitt ár. Það er mikill fengur fyrir skólann og Fljótsdalshérað að fá velmenntaða söngkonu og reynslumikinn söngkennara í þetta starf. Enn getur hún bætt við sig örfáum nemendum.

Kristín Ragnhildur Sigurðardóttir sópransöngkona og söngkennari er fædd og uppalin í Reykjavík, en er dóttir Sigurðar Eiríkssonar, sonar Kristínar Sigbjörnsdóttur frá Ekkjufelli og Eiríks Sigurðssonar frá Hjartarstöðum í Eiðaþinghá. Hún lauk söngkennaraprófi LRSM frá Söngskólanum í Reykjavík árið 2000. Aðalsöngkennarar Kristínar voru Ragnheiður Guðmundsdóttir og Þuríður Pálsdóttir.

Kristín nam óperusöng á Ítalíu hjá Rinu Malatrasi á árunum 1993-1997, og tók þar þátt í óperustúdíói á svipuðum tíma. Hún sótti einnig tíma hjá Mariu Teresu Uribe í Ungverjalandi og tók þátt í óperustúdíói þar á vegum þjóðaróperunnar í Budapest. Kristín var söngkennari hjá Söngskóla Sigurðar Demetz á árunum 2000-2016. Kristín hefur starfað sem sópransöngkona á Íslandi frá árinu 1997 og komið fram sem sópran víða hérlendis sem og erlendis.

Við bjóðum Kristínu hjartanlega velkomna til starfa!